21. apríl 2010

Sóðaskapur í Bláfjöllum.

Þann 20. apríl s.l. barst heilbrigðiseftirliti ábending um að einhver eða einhverjir hefðu losað drasl á svæði utan vegar í Bláfjöllum og borið eld að. Eins og myndirnar sýna þá er einkum um að ræða timbur og pappa en auk þess smá drasl eins og fáeinar ,,diskettur’’, ein olíusía, sjónvarpsskjár, plaststampur ofl. Úrgangur sem auðvelt er að skila á einhverja af endurvinnslustöðvum Sorpu og sem væntanlega hefur fallið til við tiltekt á litlum vinnustað eða á heimili.

Sá eða þeir sem að þessum verknaði stóðu reyndu að hylja slóð sína með því að fara í hvarf frá Bláfjallavegi og leggja eld að. Kjarkurinn virðist hafa verið lítill, því eins og myndirnar bera með sér, hafa þeir horfið af vettvangi áður en eldurinn slokknaði og draslið brann. Brunaleifarnar uppgötvuðust að morgni s.l. sunnudags en sá er fyrst kom að fór um sama svæði síðdegis á laugardag án þess að verða nokkurs var.