Skyndibitastaðir
Viðmiðunarreglur um aðbúnað:

Heimilt er að selja ýmsa kalda og heita áleggsrétti, einfalda smárétti s.s. pítur, hamborgara, kjúklingabita, franskar kartöflur og hrásalat. Að auki er heimilt að selja sömu vörutegundir og í söluturnum.

A: Eldhús. (Matv:Viðaukar 3, 4 og 5)
Frágangur á gólfum, loftum, veggjum, svo og tækjum og búnaði skal vera þannig að auðvelt sé að þrífa. Við hönnun og fyrirkomulag á búnaði skal gæta þess að ekki sé hætta á krosssmiti vegna matvæla, hrárra og soðinna, efna, hluta, lofts eða vatns.
Lofthæð minnst 2,45 m.
Æskilegt er að eldhús sé a.m.k. 18 m2.

Eftirfarandi búnaður er nauðsynlegur:

Vaskar

1. Tækja og áhaldavaskur fyrir uppþvott á pottum og öðrum áhöldum, sem notuð eru í eldhúsi.

2. Matvælavaskur. Í stórum eldhúsum er mælt með að hafa tvo slíka vaska, annan fyrir grænmeti og hinn fyrir kjöt. Þar sem ekki er vinnsla við matvæli þarf ekki matvælavask.

3. Handlaug eingöngu ætluð fyrir handþvott starfsfólks. Við hana sótthreinsandi sápulögur og einnota handþurrkur.

4. Uppþvottavaskur við uppþvottavél eingöngu ætlaður fyrir uppþvott á borðbúnaði gesta. Þar sem notaður er einnota borðbúnaður fyrir gesti þarf ekki þennan búnað.
Kælar og frystar, stærð og fjöldi í samræmi við stærð og umfang skyndibitastaðarins.
Aðstaða til að halda mat heitum > 60 °C.

B. Starfsfólk

Fullnægjandi starfsmannaaðstaða, vel loftræst.

1. Snyrtiherbergi með fordyri (búningsherbergi nægir sem fordyri). Salerni og handlaug, ásamt sápuskammtara og einnota handþurrkum. Aðeins ætlað starfsfólki.

2. Búningsherbergi. Þar sem engin vinnsla er með óvarin matvæli nægja skápar í stað búningsherbergja.

3. Kaffiaðstaða. Þar sem engin vinnsla er með óvarin matvæli getur kaffiaðstaða verið inni í búningsaðstöðu.


C. Loftræsting

1. Loftræstirásir frá eldhúsum veitingahúsa skulu uppfylla ákvæði byggingarreglugerðar.

2. Loftræsting frá salernum skal vera lögð í sérstökum loftstokkum, óháðum öðrum loftræstibúnaði.


D. Veitingasalur

1. Rými fyrir hvern gest er áætlað 0,9 fermetrar.

2. Snyrtiherbergi fyrir gesti. Lágmark tvö, þar af annað aðgengilegt fyrir fatlaða í hjólastólum. Salernum sé fjölgað um 2 fyrir hverja 50 gesti. Salerni skal ekki opnast beint inn í veitingasal.

3. Tryggja skal reyklaust svæði í veitingasal.


E. Annað

1. Ræstitækjageymsla, vel loftræst með skolvaski, skal vera á hverri hæð.

2. Geymslur eins og þurfa þykir.

3. Sorpgeymsla.

4. Ávallt skal halda umhverfi þrifalegu. Ef misbrestur verður þar á, er hægt að láta þrífa á kostnað eiganda.

Eigandi/forráðamaður skuldbindur sig til að sjá um að starfsemin og rekstur skyndibitastaðarins sé í samræmi við gildandi lög um hollustuhætti og heilbrigðiseftirlit, lög um matvæli, svo og önnur lög og reglur er starfsemina varða. Brot á þessum reglum geta valdið afturköllun starfsleyfis.


Dæmi um umgengnireglur fyrir starfsfólk á skyndibitastöðum

1. Hlífðarfatnaður sem fólk á að fá til notkunar á vinnustað er ætlaður til að verja matvælin gegn utanaðkomandi mengun. Hann á að hylja eigin fatnað. Hárnet skal nota þegar unnið er við óvarin matvæli.

2. Óheimilt er að fara útaf af vinnusvæðinu í hlífðarfatnaðinum.

3. Áður en farið er á salerni verður að fara úr öllum hlífðarfötum, líka sloppum. Alltaf er hætta á að saurgerlar eða aðrir hættulegir gerlar geti borist á hendur og vinnufatnað. Hendur skulu þvegnar og sótthreinsaðar áður en farið er aftur í hlífðarfatnaðinn. Starfsfólk er minnt á að alls ekki má naga neglur, sleikja fingur eða bora í nefið og enn síður hósta og hnerra eða hrækja í námunda við matvæli.

4. Ekki má fara inn á vinnusvæði í útiskóm og/eða án hlífðarfatnaðar.

5. Gæta þarf fyllsta hreinlætis eftir að komið er inn á vinnusvæðið.

6. Matvæli sem detta á gólfið má hvorki setja upp á vinnuborð né í vinnslulínu aftur. Detti hins vegar ílát eða áhöld á gólfið skulu þau þvegin áður en þau eru notuð aftur.

7. Allan hlífðarfatnað svo sem svuntur, höfuðföt og skófatnað skal þrífa í lok vinnudags.

8. Neysla matar og tóbaks er óheimil nema á stöðum sem sérstaklega eru til þess ætlaðir.